Шүүх эмнэлгийн шинжилгээний шинэ лаборатори БНСУ-ын зээлээр баригдана

Монгол Улсын Засгийн газар, Бүгд Найрамдах Солонгос Улсын Засгийн газар хоорондын Ерөнхий хэлэлцээрийн хүрээнд БНСУ-ын Экзим банкны хөнгөлөлттэй зээлээр хэрэгжүүлж буй “Шүүх шинжилгээний байгууллагын хүчин чадлыг сайжруулах төсөл (МОН-22)”-ийн хүрээнд баригдах Шүүх анагаах ухааны шинжилгээний лабораторийн иж бүрэн цогцолборын шав тавих ёслолын арга хэмжээ амжилттай боллоо.

✅Арга хэмжээнд: Монгол Улсын Их Хурлын гишүүн, Хууль зүйн байнгын хорооны дарга Л.Мөнхбаатар, Монгол Улсын Их Хурлын гишүүн, Засгийн газрын гишүүн, Хууль зүй, дотоод хэргийн сайд Г.Тэмүүлэн, БНСУ-ын Экзим банкны Монгол дахь суурин төлөөлөгч Парк Сэ Ёнг, Шүүх шинжилгээний ерөнхий газрын дарга, цагдаагийн хурандаа Н.Ганбаяр, төслийн зөвлөх багийн ахлагч, “Аум энд Ли Архитектур энд Ассоциаци” ХХК-ийн дэд ерөнхийлөгч Ким Жон Мин, барилгын ажлын гүйцэтгэгч “Мёнду Констракшн” ХХК-ийн ерөнхий захирал Рю Чан У нар оролцов.

✅Мөн Хууль зүй, дотоод хэргийн яамны газрын дарга нар, тус яамны харьяа агентлаг, байгууллагуудын удирдлага, Батлан хамгаалах яамны төлөөлөл, барилгын захиалагчийн хяналт хэрэгжүүлэгчид, төсөл хэрэгжүүлэх нэгж, зөвлөх багийн төлөөлөл болон Шүүх шинжилгээний ерөнхий газрын даргын зөвлөлийн гишүүд, үе үеийн удирдлага, алба хаагчид оролцлоо.

✅Тус лабораторийн иж бүрэн цогцолбор ашиглалтад орсноор орчин үеийн шинжлэх ухаан, дэвшилтэт техник, технологид тулгуурлан шүүх эмнэлгийн шинжилгээний үйл ажиллагааг хөгжүүлэх, шинжээч эмч нарын мэргэжлийн ур чадварыг сайжруулах, шинжилгээний чанар, үр дүн, найдвартай байдлыг дээшлүүлэх, иргэдэд төрийн үйлчилгээг түргэн шуурхай, чанартай хүргэх нөхцөл бүрдэх юм.