Шүүхийн тамгын газрын 40 гаруй албан хаагчид хүний эрхийн сургалт орлоо

Өнөөдөр (2026.10.22) Хүний эрхийн Үндэсний Комиссоос Дүүргийн эрүү, иргэний хэргийн хялбар ажиллагааны анхан шатны тойргийн шүүхийн Тамгын газрын 40 гаруй албан хаагчийг хамруулан хүний эрхийн сургалт зохион байгууллаа.

Сургалт нь шүүхийн Тамгын газрын албан хаагчдын хүний эрхийн талаарх мэдлэг, ойлголтыг бэхжүүлэх, хэрэг хянан шийдвэрлэх ажиллагаанд хүүхдийн эрхийг хангах хандлага, арга зүйг төлөвшүүлэх, төрийн үйлчилгээг хүний эрхэд суурилсан хандлагаар хүргэх, иргэдтэй харилцахдаа хүний эрх, эрхэм чанарыг хүндэтгэх, ажил үүргээ хэрэгжүүлэх явцад хүний эрхийн зарчмыг баримтлах, төрийн албан хаагчийн ёс зүйн мэдлэгийг дээшлүүлэх зорилготой юм.

Сургалтаар дараах сэдвийн хүрээнд оролцогчдын мэдлэг, ойлголтыг нэмэгдүүлэв.

Үүнд:

• ХЭҮК-ын ХЭБХ-ийн дарга Х.Цэцгээ “Хүний эрхэд суурилсан төрийн үйлчилгээ” • ХЭБХ-ийн референт О.Тодбулаг “Хөдөлмөрлөх эрхийн зарим асуудал”

• Шүүгч Т.Болормаа, Ц.Наранчимэг “Хэргийн оролцогчийг угтан авах хандлага арга зүй”

• Монгол Улсын Ёс зүйн хорооны Ажлын албаны Соён гэгээрүүлэх хэлтсийн дарга Ц.Заяхүү “Төрийн албан хаагчийн ёс зүй”

• Шүүхийн ерөнхий зөвлөлийн Ажлын албаны сэтгэл зүйч Т.Энхгэрэл “Ажлаас халшрах хам шинж түүнээс гарах арга зам”

Сургалтын төгсгөлд оролцогчид хэлэлцсэн асуудлуудаар дүгнэлт хийж, олж авсан мэдлэг, ойлголтоо өдөр тутмын ажил, төрийн үйлчилгээнд хэрхэн хэрэгжүүлэх талаар санал солилцон, хэлэлцүүлэг өрнүүллээ.

Ийнхүү сургалт нь албан хаагчдын хүний эрхийн талаарх мэдлэг, ойлголтыг бэхжүүлэхийн зэрэгцээ хүний эрхэд суурилсан төрийн үйлчилгээний хандлагыг төлөвшүүлэх, хүүхдийн эрхийг хангах, төрийн албан хаагчийн ёс зүйг эрхэмлэхэд чиглэснээрээ үр дүнтэй боллоо.