3169.42 га атар газрыг тариалангийн газарт шилжүүлнэ

🇲🇳🇲🇳🇲🇳 Монгол Улсын Засгийн газрын өнөөдөр (2026.10.14)-ийн хуралдаанаар Говь-Алтай аймгийн Тайшир сум болон Төв аймгийн Аргалант, Батсүмбэр, Баяндэлгэр, Баянчандмань, Сэргэлэн, Цээл, Эрдэнэ сумдын нутаг дэвсгэр дэх нийт 3169.42 га атар газрыг тариалангийн газрын ангилалд шилжүүлэх асуудлыг хэлэлцэн баталлаа.

Монгол Улсын Их Хурлын 2022 оны “Хүнсний хангамж, аюулгүй байдлыг хангах талаар авах зарим арга хэмжээний тухай” 36 дугаар тогтоолын 3.а-д “тариалангийн зориулалттай газар ашиглалтыг сайжруулах, талбайн хэмжээг нэмэгдүүлэх зорилгоор шинээр 200.0 мянган гектар хүртэл атар газрыг тариалангийн газарт шилжүүлэх, эргэлтийн талбайг 1.1 сая гектарт хүргэх, усалгаатай тариалангийн талбайг 5000 гектараар нэмэгдүүлэх, тариалангийн газрыг улсын газар зохион байгуулалтын ерөнхий төлөвлөгөөтэй уялдуулах”, Засгийн газрын 2024-2028 оны үйл ажиллагааны мөрийн хөтөлбөрийн 3.3.4.13-т “Хүн амын өсөн нэмэгдэж байгаа хүнсний хэрэгцээг хангах зорилгоор “Атар IV” аяныг хэрэгжүүлж, газар тариалангийн нийт эргэлтийн талбайг 200.0 мянган га-гаар нэмэгдүүлнэ” гэж тус тус заасан байдаг.

Энэхүү тогтоол, шийдвэрийн хэрэгжилтийг хангах хүрээнд Засгийн газраас атар газрыг тариалангийн ангилалд шилжүүлэх ажлыг үе шаттай зохион байгуулж ирсэн бөгөөд 2024 оноос хойш 2 удаагийн тогтоолоор нийт 83 мянган га атар газрыг тариалангийн газарт шилжүүлсэн байна.

Ийнхүү атар газрыг тариаланд шилжүүлснээр Газрын нэгдмэл сангийн бүртгэлтэй 1.2 сая га тариалангийн талбайн хэмжээг 1.28 сая га-д хүргэж, Хүнсний хувьсгал, “Атар IV” аян, Шинэ хоршоо хөдөлгөөн зэрэг төрөөс хэрэгжүүлж буй томоохон бодлогын хэрэгжилтийг эрчимжүүлэх, хүн амын хүнсний хангамжийг нэмэгдүүлэх, хөдөө орон нутагт шинээр ажлын байр бий болгох зэрэг ач холбогдолтой юм.