Стандартын шинэ хуулиар үндэсний стандартыг үнэ төлбөргүй болгоно

Хуулийн төсөл нийт 9 бүлэг, 38 зүйлтэй бөгөөд дараах өөрчлөлтүүдийг тусгажээ.Нэгдүгээрт. Стандарт хэрэглэх эрх, үүргийг тодорхой болгоно. Үндэсний стандартыг нээлттэй, үнэ төлбөргүй ашиглах нөхцөлийг бүрдүүлж, заавал мөрдөх шаардлагыг тодорхойлно.Хоёрдугаарт. Лабораторийн гурван шатлалт тогтолцоог хуульчилна. Лабораториудын чадавхыг уялдуулан хөгжүүлэх, хөрөнгө оруулалт, тоног төхөөрөмжийн давхардлыг бууруулах, төр, хувийн хэвшлийн нөөцийг зохистой ашиглах эрх зүйн үндэс бүрдэнэ.Гуравдугаарт. Тохирлын үнэлгээ, итгэмжлэлийн байгууллагын хариуцлага, хараат бус байдлыг бэхжүүлнэ.Итгэмжлэлийн байгууллагын засаглал бэхжиж, техникийн хороо, маргаан шийдвэрлэх комисс, шинжээчийн эрх, үүрэг, үйл ажиллагааг нарийвчлан зохицуулсан. Төслийн 31 дүгээр зүйлд улсын байцаагч хяналт шалгалтын үйл ажиллагаандаа итгэмжлэгдсэн тохирлын үнэлгээний байгууллагын үр дүнг ашиглаж болохоор тусгасан.Дөрөвдүгээрт. Мэдээллийн нэгдсэн сан байгуулна. Стандарт, лабораторийн шинжилгээ, тохирлын үнэлгээ, итгэмжлэлийн мэдээллийг нэгтгэж, давхардсан шалгалтыг бууруулна.Тавдугаарт. Олон улсын худалдааны зохицуулалтыг сайжруулна. Олон улс, бүс нутаг, гадаад улсын стандартыг хэрэглэх нөхцөлийг тодорхойлж, тохирлын үнэлгээний үр дүнг харилцан хүлээн зөвшөөрөх замаар давхардсан баталгаажуулалт, худалдааны техникийн саад тотгорыг бууруулахыг зорьж байна. Монгол бүтээгдэхүүн чанартай байхын зэрэгцээ тэр чанараа олон улсад хүлээн зөвшөөрөгдөх арга, тогтолцоогоор нотолдог байх ёстой.Зургаадугаарт. Хяналт, төрийн худалдан авалтын шаардлагыг тодорхой болгоно. Зах зээлд нийлүүлж байгаа болон улсын хилээр нэвтрүүлж байгаа бүтээгдэхүүний тохирлын баталгаанд хяналт тавих харилцааг нарийвчлан зохицуулсан. Төрийн худалдан авалтын үр дүнг иргэдэд хүрч байгаа бүтээгдэхүүн, үйлчилгээний бодит чанар, аюулгүй байдлаар хэмжих ёстой гэсэн өөрчлөлтүүдийг тусгажээ.