Үндэсний аудитын газрын захирал Л.Нүрзэд олон улсын чанарын удирдлагын гэрчилгээ авлаа

Аудитын чанарын удирдлагын олон улсын мэргэшсэн анхны мэргэжилтэн төрлөө

2026-11-09 — Онцлох мэдээ

Аудитын дээд байгууллагуудын Олон улсын байгууллага (ИНТОСАИ)-ын Хөгжлийн санаачилга (Аи Ди Аи)-аас хэрэгжүүлсэн Аудитын чанарын удирдлагын олон улсын мэргэшсэн мэргэжилтэн бэлтгэх хөтөлбөрт Монгол Улсын Үндэсний аудитын газрын Чанарын удирдлага, эрсдэлийн газрын захирал, тэргүүлэх аудитор Л.Нүрзэд амжилттай хамрагдаж, олон улсын мэргэшсэн гэрчилгээ авлаа. Энэ оны эхнээс нийт 10 сарын хугацаанд хэрэгжсэн тус хөтөлбөрийн хүрээнд тэрбээр шаардлагатай сургалт, шалгалт болон үнэлгээний бүх шалгуурыг амжилттай хангаснаар тэрбээр Аи Ди Аи-ийн гэрчилгээтэй аудитын чанарын удирдлагын чиглэлээр мэргэшсэн олон улсын анхны мэргэжилтэн болж байгаа юм. Ингэснээр Монгол Улсын Төрийн аудитын байгууллага төлөөллөөрөө дамжуулан Аи Ди Аи-ийн аудитын чанарын удирдлагын мэргэшсэн мэргэжилтнүүдийн дэлхийн хэмжээний мэргэжлийн сүлжээнд нэгдэж, бусад улсын аудитын дээд байгууллагуудад чанарын удирдлагын тогтолцоог нэвтрүүлэх, бэхжүүлэхэд мэргэжлийн зөвлөгөө, дэмжлэг үзүүлэх, олон улсын түвшинд мэдлэг, туршлагаа хуваалцах боломж бүрдэж байна. Өнөөдөр Монгол Улсын Ерөнхий аудитор С.Магнайсүрэн Аи Ди Аи-аас ирүүлсэн гэрчилгээг Үндэсний аудитын газрын Чанарын удирдлага, эрсдэлийн газрын захирал, тэргүүлэх аудитор Л.Нүрзэдэд гардуулан өгч, амжилт хүслээ. Энэхүү амжилт нь Монгол Улсын Төрийн аудитын байгууллагын хүний нөөцийн мэргэжлийн чадавхыг олон улсын түвшинд хөгжүүлэх, аудитын чанарын удирдлагын тогтолцоог бэхжүүлэхэд чухал хувь нэмэр оруулна гэдгийг тэрбээр онцолсон юм.