Зөвшөөрөл, мэдэгдлийн шинэ хуулийг хэрэгжүүлэх цахим сургалт орлоо

Монгол Улсын Засгийн газраас хэрэгжүүлж буй “Чөлөөлье” санаачилгын хүрээнд төрийн үйлчилгээний шат дамжлагыг бууруулах, иргэн, аж ахуйн нэгжийн үйл ажиллагааг хөнгөвчлөх, зөвшөөрөл олгох үйл ажиллагааг ил тод, шуурхай болгох зорилгоор Зөвшөөрлийн тухай хуульд 2026 оны 7 дугаар сарын 3-ны өдөр нэмэлт, өөрчлөлт оруулж, Зөвшөөрөл, мэдэгдлийн тухай хууль болгон шинэчилсэн бөгөөд 2026 оны 8 дугаар сарын 31-ний өдрөөс орон даяар мөрдөж эхэлсэн.

Тус хуулийн хэрэгжилтийг хангах, шинэчилсэн зохицуулалтын талаарх нэгдсэн ойлголтыг төлөвшүүлэх, зөвшөөрөл олгох үйл ажиллагааны цахимжилтыг эрчимжүүлэх, зөвшөөрөл, мэдэгдлийн цахим системийн ашиглалтыг сайжруулах зорилгоор аймгийн Засаг даргын Тамгын газраас Эдийн засаг, хөгжлийн яам, Засгийн газрын Хяналт хэрэгжүүлэх газар, Санхүүгийн мэдээллийн технологийн төв УТҮГ-тай хамтран өнөөдөр цахим сургалт зохион байгууллаа.

Сургалтад аймгийн Засаг даргын орлогч К.Бахытжан, аймгийн Засаг даргын Тамгын газрын дарга Б.Мухамед нар оролцож, хуулийн шинэчилсэн зохицуулалтыг хэрэгжүүлэхэд байгууллага хоорондын уялдаа холбоог хангах, зөвшөөрөл, мэдэгдлийн цахим системийн хэрэглээг сайжруулах, төрийн үйлчилгээний ил тод, шуурхай, хүртээмжтэй байдлыг нэмэгдүүлэхийн ач холбогдлыг онцлон тэмдэглэв.

Тус сургалтад аймгийн Засаг даргын Тамгын газрын албан хаагчид, сумдын Засаг даргын Тамгын газрын дарга нар, холбогдох мэргэжилтнүүд болон хэлтэс, агентлагийн улсын байцаагчид танхимын болон цахим хэлбэрээр хамрагдлаа.