Нийгмийн халамжийн тэтгэвэр 11-р сарын 1-нээс 600 мянга ₮ болно

Батлагдсан байгууллага: Засгийн газрын тогтоол

МОНГОЛ УЛСЫН ЗАСГИЙН ГАЗРЫН ТОГТООЛ

2026 оны 10 сарын 28 өдөр

Дугаар 424

Улаанбаатар хот

НИЙГМИЙН ХАЛАМЖИЙН ТЭТГЭВЭР, ТЭТГЭМЖИЙН ХЭМЖЭЭГ ШИНЭЧЛЭН ТОГТООХ ТУХАЙ

Нийгмийн халамжийн тухай хуулийн 16 дугаар зүйлийн 16.1 дэх хэсэг, Хөгжлийн бэрхшээлтэй хүний эрхийн тухай хуулийн 28 дугаар зүйлийн 28.3 дахь хэсгийг тус тус үндэслэн Монгол Улсын Засгийн газраас ТОГТООХ нь:

1.Нийгмийн халамжийн тэтгэвэр, зарим тэтгэмжийн хэмжээг доор дурдсанаар шинэчлэн тогтоосугай:

1.1.Нийгмийн халамжийн тухай хуулийн 12 дугаар зүйлийн 12.1.1-12.1.5-д заасан иргэнд сард олгох тэтгэврийн хэмжээг 600,000.00 (зургаан зуун мянга) төгрөг;

1.2.Нийгмийн халамжийн тухай хуулийн 13 дугаар зүйлийн 13.2.1-13.2.4-т заасан иргэнд сард олгох асаргааны тэтгэмжийн хэмжээг 370,000.00 (гурван зуун далан мянга) төгрөг;

1.3.байнгын асаргаа шаардлагатай хүнд хэлбэрийн хөгжлийн бэрхшээлтэй хүүхдийг асарч байгаа иргэнд сард олгох асаргааны тэтгэмжийн хэмжээг 524,000.00 (таван зуун хорин дөрвөн мянга) төгрөг.

2.Энэ тогтоол гарсантай холбогдуулан "Нийгмийн халамжийн тэтгэвэр, тэтгэмжийн хэмжээг шинэчлэн тогтоох тухай" Засгийн газрын 2025 оны 12 дугаар сарын 31-ний өдрийн 241 дүгээр тогтоолыг хүчингүй болсонд тооцсугай.

3.Энэ тогтоолыг 2026 оны 11 дүгээр сарын 01-ний өдрөөс эхлэн дагаж мөрдсүгэй.

МОНГОЛ УЛСЫН ЕРӨНХИЙ САЙД Н.УЧРАЛ

ГЭР БҮЛ, ХӨДӨЛМӨР, НИЙГМИЙН ХАМГААЛЛЫН САЙД Т.АУБАКИР