Хэнтий аймгийн 89 багийн Засаг дарга нарт иргэдийн оролцооны сургалт орлоо

“Иргэдийн оролцоот – Нэг Хэнтий” арга хэмжээний хүрээнд Хэнтий аймгийн 89 багийн Засаг дарга, сумдын Засаг даргын Тамгын газрын дарга нарт зориулсан сургалт зохион байгуулагдлаа.

Сургалт “Зөвлөлдөх санал асуулгын талаар ойлголт, хэрэгжүүлэх арга зүй”, “Зөвлөлдөх санал асуулга ба иргэдийн оролцоо” сэдвийн хүрээнд үргэлжилж, зөвлөлдөх санал асуулгын ач холбогдол, хэрэгжүүлэх арга зүй, иргэдийн оролцоог шийдвэр гаргах үйл явцад бодитой хангах боломжийн талаар мэдлэг, мэдээлэл өгч, санал солилцлоо.

Сургалтад Хэнтий аймгийн Засаг дарга Д.Аюурбунь болон аймгийн Засаг даргын Тамгын газрын хэлтсийн дарга нар оролцож, иргэдэд ойр, иргэдийн оролцоонд тулгуурласан төрийн үйлчилгээг төлөвшүүлэхэд багийн Засаг дарга нарын үүрэг, оролцоо чухал болохыг онцоллоо.

Энэхүү сургалт нь төрийн байгууллагын үйл ажиллагаанд иргэдийн оролцоог нэмэгдүүлэх, иргэдийн санал бодлыг шийдвэр гаргалтад тусгах, төр, иргэний хамтын ажиллагааг бэхжүүлэх, орон нутгийн хөгжлийн асуудлыг иргэдтэй зөвлөлдөн шийдвэрлэх чадавхыг бэхжүүлэхэд чиглэсэн юм.