Дэлхийн багш нарын 32, Монголын багш нарын 60 дахь өдөр зохион байгуулагдлаа.

Сэлэнгэ аймгийн боловсролын салбарынхан Дэлхийн багш нарын 32 Монголын багш нарын 60 дахь өдрөө өнөөдөр тэмдэглэлээ.

Баярын хурал арга хэмжээнд Сэлэнгэ аймгийн ИТХ-ын дарга Г.Бат-Орхон, Сэлэнгэ аймгийн Засаг дарга Н.Лхагвадорж, Монгол Улсын Ардын багш, Ерөнхий сайдын дэргэдэх Хүүхдийн төлөө үндэсний зөвлөлийн гишүүн Ч.Цэрэндулам, багш, ажилтнууд оролцлоо.

Сэлэнгэ аймаг 2026 оныг “Бүх нийтийн боловсролыг дэмжих жил” болгон зарласан бөгөөд боловсролын салбарт аймаг, орон нутгийн төсвөөс сургалтын орчин нөхцөлийг сайжруулах боловсролыг дэмжих чиглэлээр 2,4 тэрбум гаруй төгрөг, багш, суралцагч хүүхдүүдийг олон улс, тив дэлхий, аймгийн аварга, бүсийн чанартай уралдаан, олимпиадад оролцуулах, боловсролыг дэмжих чиглэлээр аймгийн Засаг даргын үйл ажиллагааны хөтөлбөрийн зардлаас 290 гаруй сая төгрөгийг зарцуулан боловсролын салбарыг дэмжин ажиллаж байна.

Манай аймгийн хэмжээнд ерөнхий боловсролын сургууль, цэцэрлэг, Политехникийн коллежуудад нийт 1500 гаруй багш нар боловсролын үйлчилгээг 30,0 мянга гаруй хүүхэд, багачууд, оюутан суралцагчдад хүргэн ажиллаж байна.

Багш хэмээх алдрыг өндөрт өргөж, Монголын үр хойчид боловсрол олгох эрхэм үйл хэрэгт эрдэм, мэдлэг, авьяас чадвар, ур ухаан, бүхий л амьдралаа харамгүй зориулсан ахмад багш нар, одоо ажиллаж буй багш нар, боловсролын салбарын ажилтан, албан хаагчид та бүхэндээ багш нарын баярын мэнд хүргэе.