Баянгол дүүрэгт 500 айл өрхийг дулаалж эхэллээ

Нийслэлийн агаарын бохирдлыг бууруулах зорилтын хүрээнд Баянгол дүүрэгт энэ онд дүүргийн төсвийн хөрөнгө оруулалтаар 9, 10, 21, 22, 23-р хорооны нийт 500 өрхийг “Дулаалга” төсөлд хамруулахаар төлөвлөсөн. Ингэхдээ эхний ээлжинд хороо болгоноос тодорхой шалгуур хангасан 30, нийт 150 өрхийг сонгон дулаалахаар бөгөөд өнөөдөр дүүргийн Засаг дарга Ө.Сумъяабаатар, ХСТНААХ-ийн дарга Г.Мөнх-Эрдэнэ, НҮБ-ын Хүүхдийн сангийн “EASY CHIP” төслийн багийнхан болон хамтран хэрэгжүүлэгч нартай 9, 21-р хорооноос энэ төсөлд хамрагдахаар сонгогдсон айл өрхийн төлөөлөлтэй уулзаж, НҮБ-ын Хүүхдийн сангийн дулаалгын стандартыг хангасан “EASY CHIP” төслийн талаар нэгдсэн мэдээлэл өглөө.

Дүүрэг орон нутгийн зүгээс “Дулаалга” төсөлд хамрагдах айл өрхийг сонгохдоо,

Оршин суугаа газар нь газар чөлөөлөлт, дахин төлөвлөлтөд ороогүй байх,

Тухайн хорооны үндсэн оршин суугч байх ба цаашид тогтвор суурьшилтай амьдрах,

Ам бүлийн тоо олон эсвэл ахмад настан байх зэрэг тодорхой шалгуурыг тавьсан.

Мөн иргэдийн оролцоог нэмэгдүүлэх зорилгоор гэрийн дулаалгын 82 хувийг дүүргийн төсвөөс, үлдсэн 18 хувийг иргэд өөрсдөө гаргахаар гэрээндээ тусгасан юм.

Ингэснээр иргэд гэрээгээ байгуулах үедээ 18 хувийн төлбөрөө шууд төлснөөр гэрээ дулаалж, тав тухтай орчинд амьдрах боломж бүрдэх нь.

Түүнчлэн өнгөрсөн онд нийслэлийн ЗДТГ, НҮБ-ын “Хүүхдийн сан” хамтран дүүргийн 11, 16, 23-р хорооны нийт 872 өрхийг “EASY CHIP” багц төслийн хүрээнд дулаалж, хийн зууханд холбосон. Судалгаагаар айл өрхүүд гэр, байшингаа дулааснаар түлшний хэрэглээ 40 хүртэл хувь багасснаар эдийн засгийн хувьд хэмнэлт үүссэн төдийгүй эрүүл, тав тухтай орчинд амьдрах нөхцөл бүрдсэн гэсэн юм.

Баянгол дүүргийн ХСТНААХ-ийн дарга мэргэжилтнүүд “Чип” төслийн багийнхантай энэ сарын 24, 25-ны өдөр дүүргийн 10, 22, 23-р хороонд ажиллана.