Дарханы 10 МВт нарны станц 9 жилд 164 сая кВт.ц үйлдвэрлэж, 19.5 тэрбум ₮ татвар өгсөн

Уншсан既読ReadLuGelesen 1

2026-11-01

ТүгээхShare共有する공유하기PartagerTeilen

Facebook

Twitter

Pinterest

Linkedin

Copy

Эрчим хүчний сайд Б.Найдалаа тэргүүтэй Ажлын хэсэг өвөлжилтийн бэлтгэл шалгах ажлын хүрээнд Дархан-Уул аймагт ажилллаж байна.

Энэ үеэр Монголын анхны 10 МВт нарны цахилгаан станцын үйл ажиллагаатай танилцлаа. "Солар повер интернейшнл” ХХК-ийн хэрэгжүүлж буй уг станц нь 2017 оны нэгдүгээр сарын 1-нээс байнгын ашиглалтад орж, төвийн эрчим хүчний системд цахилгаан эрчим хүч нийлүүлж эхэлжээ.

Тус станц нь жилд 16.5–18.0 сая кВт.цаг цахилгаан эрчим хүч үйлдвэрлэх хүчин чадалтай бөгөөд энэ оны аравдугаар сарын байдлаар нийт 164.0 сая кВт.цаг цахилгаан эрчим хүч үйлдвэрлэж, үүнээс 162.9 сая кВт.цагийг эрчим хүчний системд нийлүүлжээ. Мөн байгуулагдсан цагаасаа хойш өнөөдрийг хүртэлх есөн жилийн хугацаанд нийт 19.5 тэрбум төгрөгийн татвар улсын төсөвт төвлөрүүлсэн байна.

Станцын үндсэн тоног төхөөрөмжид 31,000 гаруй нарны зай, 16 инвертер, 8 трансформатор болон бусад тоноглол багтдаг бөгөөд 110 кВ-ын цахилгаан дамжуулах агаарын шугамаар Дархан дэд станцтай холбогдон ажилладаг.

Нарны цахилгаан станц нь ашиглалтад орсноосоо хойших хугацаанд нүүрсхүчлийн хийн ялгарлыг тооцооллоор 130.7 мянган тонноор бууруулсан байна. Мөн станцын үйлдвэрлэсэн цахилгаан эрчим хүчийг нүүрсээр ажилладаг эх үүсвэрийн түлшний зарцуулалттай харьцуулсан тооцоогоор 1.5 сая тонн орчим түлшний хэрэглээтэй дүйцэх хэмжээний үр өгөөж үзүүлжээ.

Дарханы 10 МВт-ын нарны энэхүү цахилгаан станц нь сэргээгдэх эрчим хүчний үйлдвэрлэлийг нэмэгдүүлэх, төвийн эрчим хүчний системийн найдвартай ажиллагааг дэмжих, хүлэмжийн хийн ялгарлыг бууруулах, улсын төсвийн орлогыг бүрдүүлэхэд бодит хувь нэмэр оруулж байна.