УЛСЫН БҮРТГЭЛИЙН УХААЛАГ ЧАТБОТ 4,367 ИРГЭНД ҮЙЛЧИЛЖ, 7,649 АСУУЛТАД ХАРИУЛЖЭЭ

Улсын бүртгэлийн ерөнхий газрын chat.burtgel.gov.mn ухаалаг чатбот системийг 2026 оны 09 дүгээр сарын 30-ны өдөр хэрэглээнд нэвтрүүлсэн бөгөөд 10 дугаар сарын 15-ны өдрийн байдлаар нийт 4,367 иргэнд үйлчилж, 7,649 асуултад хариулжээ. Нийт асуултын 96 хувийг шийдвэрлэж, нэг асуултад хариулах дундаж хугацаа 5.5 секунд байна.

Иргэд тус системээс дараах чиглэлээр мэдээлэл, лавлагаа авсан байна. Үүнд:

Иргэний улсын бүртгэл – 2,795;

Эд хөрөнгийн эрхийн улсын бүртгэл – 845;

Хуулийн этгээдийн улсын бүртгэл – 1,056;

Улсын бүртгэлийн салбар, нэгжийн байршил – 1,571;

Бусад мэдээлэл, лавлагаа – 1,382

Ухаалаг чатбот нь улсын бүртгэлийн байгууллагын үйл ажиллагаа, үйлчилгээний төрөл, төлбөр хураамж, дансны мэдээлэл, салбар нэгжийн байршил болон иргэн, хуулийн этгээд, эд хөрөнгийн бүртгэлтэй холбоотой хуулиар нээлттэй мэдээллийг нэг дороос авах боломжийг бүрдүүлсэн цахим туслах үйлчилгээ юм. Иргэд асуултаа өдөр тутмын энгийн хэлээр бичиж, баталгаатай эх сурвалжид үндэслэсэн хариултыг шуурхай авахын зэрэгцээ зургаан хэлээр мэдээллээ авах боломжтой.