ТӨРИЙН АЛБАНЫ ЗӨВЛӨЛИЙН ХҮНИЙ НӨӨЦИЙН АУДИТЫН БАГ УЛСЫН БҮРТГЭЛИЙН ЕРӨНХИЙ ГАЗАРТ АЖИЛЛАЖ БАЙНА

Төрийн албаны зөвлөлөөс Засгийн газрын агентлагуудын сул орон тоог нөхөх үйл ажиллагаанд хууль тогтоомжийн хэрэгжилтийг үнэлэх зорилгоор хүний нөөцийн аудитын шалгалтыг зохион байгуулж байна.

Уг аудитын шалгалтын баг Улсын бүртгэлийн ерөнхий газарт ажиллаж байгаа бөгөөд байгууллагын сул орон тоо үүссэнээс эхлэн мэдээлэх, нөхөх, нэр дэвшүүлэх, томилох хүртэлх үйл ажиллагаа холбогдох хууль тогтоомж, журамд нийцэж байгаа эсэхийг шалган, үнэлгээ хийх юм.

Мөн сул орон тоог төрийн жинхэнэ албан хаагчийг шатлан дэвшүүлэх зарчмаар нөхөх боломжийг бүрдүүлсэн эсэх, хүний эрх, жендэрийн эрх тэгш байдлыг хангаж ажилласан байдал, сул орон тоотой холбоотой өргөдөл, гомдлыг хууль тогтоомжийн хүрээнд шийдвэрлэсэн эсэхийг хамруулан үзэж байна.

Аудитын үр дүнд байгууллагын хүний нөөцийн үйл ажиллагаанд дүгнэлт өгч, цаашид хууль тогтоомжийн хэрэгжилтийг хангах, хүний нөөцийн бодлого, үйл ажиллагааг боловсронгуй болгоход чиглэсэн зөвлөмж гаргах юм.

Төрийн албаны зөвлөлөөс нийт 30 байгууллагад хүний нөөцийн аудит хийхээр төлөвлөсөн бөгөөд уг ажил нь төрийн байгууллагын хүний нөөцийн үйл ажиллагааг хууль тогтоомжид нийцүүлэх, хэрэгжилтийг сайжруулахад чиглэж байна6