С.Наранцогт: Баялгаар баталгаажаагүй мөнгө хэвлэж инфляц өдөөдөг “чөтгөрийн тойрог”-ийг 2027 оноос зогсооно

Монголбанкны Ерөнхийлөгч С.Наранцогтын "Өдрийн сонин"-ы 2026.10.02-ны өдрийн Баасан гарагийн №183 (8035) дугаарт өгсөн ярилцлагыг бүрэн эхээр нь хүргэж байна.

Монголбанк “Төрөөс мөнгөний бодлогын талаар 2027 онд баримтлах үндсэн чиглэл”-ийн төслийг боловсруулж, УИХ-д өргөн бариад байна. Энэ удаагийн Үндсэн чиглэл нь өмнөх жилүүдийнх шиг "гал унтраах" зорилготой уламжлалт баримт бичиг бус, харин Төв банкны хараат бус байдлыг хангаж, хуримтлагдсан 6.9 их наяд төгрөгийн алдагдлыг ил тод шийдвэрлэх, цаашлаад төсөв-мөнгөний бодлогын уялдааг хуульчлах зэрэг олон жил гацсан системийн өөрчлөлтүүдийг хөндсөнөөрөө онцлог юм.

Үндсэн чиглэлийн гол агуулга, иргэдийн амьдралд үзүүлэх бодит нөлөөллийн талаар Монголбанкны Ерөнхийлөгч С.Наранцогттой ярилцлаа.

– Монголбанкнаас 2027 онд Төрөөс мөнгөний бодлогын талаар баримтлах үндсэн чиглэлийн төслийг хэлэлцүүлж, батлуулахаар УИХ-д өргөн мэдүүлээд байна. Та өмнөх үгэндээ энэ удаагийн бодлогын баримт бичгийг уламжлалт бус хэв маягаар боловсруулсан гэж онцолсон. Юугаараа онцлог вэ?

– Хамгийн гол онцлог нь, энэ бол зүгээр нэг жилийн ажлын жагсаалт бус, эдийн засгийн суурь өвчнийг эмчлэх "Системийн шинэчлэл"-ийн эхлэл юм. Энэхүү баримт бичиг нь Монголбанкны шинэ удирдлагын баталсан “Хараат бус, хариуцлагатай, итгэл даасан Төв банк байх” 2026–2030 оны дунд хугацааны стратегитай яв цав нийцэж байгаа.

Бид өнгөрсөн хугацааны алдаагаа давтахгүй байх үүднээс, дараах дөрвөн суурь өөрчлөлтийг энэ баримт бичигт хатуу суулгаж өгсөн.

Нэгд, төв банк хуримтлагдсан алдагдал, өөрийн хөрөнгийн дутагдлаа нээлттэй тайлагнаж, бодитой шийдэл санал болгож байна.

Хоёрт, төсөв, мөнгөний бодлогын уялдааг хуульчлах шинэ тогтолцоо дэвшүүлж байна.

Гуравт, төв банк анх удаа бодлогын хэрэгжилт, үр дүнг хэмжих гүйцэтгэлийн үзүүлэлтүүдийг хариуцах нэгж, суурь болон зорилтот түвшин, тайлагнах давтамжтай нь тодорхойлсон.