Нийгмийн даатгалын байгууллагын удирдах ажилтны нэгдсэн сургалт-зөвлөгөөн болж, салбарын бодлого, шинэчлэлийг хэлэлцлээ

НИЙГМИЙН ДААТГАЛЫН БАЙГУУЛЛАГЫН УДИРДАХ АЖИЛТНЫ НЭГДСЭН СУРГАЛТ-ЗӨВЛӨГӨӨН БОЛЖ, САЛБАРЫН БОДЛОГО, ШИНЭЧЛЭЛИЙГ ХЭЛЭЛЦЛЭЭ

2026 оны 10 дугаар сарын 23-ны өдөр Нийгмийн даатгалын байгууллагын удирдах ажилтны сургалт-зөвлөгөөн амжилттай зохион байгуулагдлаа.

Тус сургалт-зөвлөгөөний зорилго нь Нийгмийн даатгалын байгууллагын бодлогын зорилтын хэрэгжилтийг эрчимжүүлэх, Нийгмийн даатгалын багц хуульд орсон нэмэлт өөрчлөлт болон тулгамдаж буй асуудлын талаар санал солилцож, мэргэжил арга зүйн удирдлагаар хангахад чиглэв.

Арга хэмжээг Гэр бүл, хөдөлмөр, нийгмийн хамгааллын яамны Төрийн нарийн бичгийн дарга А.Даваажаргал нээж үг хэлсэн бөгөөд Нийгмийн даатгалын ерөнхий газрын дарга Б.Батжаргал байгууллагын үйл ажиллагаа, цаашдын зорилтоо танилцууллаа. Мөн удирдах ажилтнуудад Нийгмийн даатгалын багц хуулийн нэмэлт, өөрчлөлтийн талаар иргэд, даатгуулагч, ажил олгогчдод хүртээмжтэй мэдээлэх, суурь тэтгэвэр олгох бэлтгэлийг хангах болон санхүүгийн сахилга бат, ил тод байдлыг хангаж ажиллахыг үүрэг болгов.

Сургалт-зөвлөгөөний үеэр холбогдох яамны болон газрын дарга нар, мэргэжилтнүүд салбарынхаа өнөөгийн байдал болон цаашид анхаарах асуудлаар илтгэл тавьж хэлэлцүүллээ. Тухайлбал, тус яамны Нийгмийн даатгал, хуримтлалын сангийн бодлогын газрын дарга В.Рэнцэнханд “Нийгмийн даатгалын өнөөгийн байдал, цаашдын чиг хандлага” сэдвээр илтгэл тавьсан бол мөн яамны Нийгмийн халамжийн бодлогын газрын дарга Ю.Отгонбилэг “Нийгмийн халамжийн шинэчлэл”-ийн талаар, Хөдөлмөрийн эрхлэлтийн бодлогын газрын дарга Б.Алимаа “Төрийн албан хаагчийн цалин хөлс, нийгмийн баталгааны тухай” илтгэл тус тус тавьсан байна.

Түүнчлэн Нийгмийн даатгалын ерөнхий газрын Бодлогын хэрэгжилт, төлөвлөлтийн газрын дарга Ц.Ганцэцэг “Нийгмийн даатгалын бодлогын хэрэгжилт, үр дүн, 2027 онд анхаарах асуудлууд”-ыг танилцуулж, Удирдлагын академийн багш С.Ганцэцэг “Төрийн албан хаагчийн хөдөлмөрийн харилцаан дахь хууль хэрэглээ”-ний талаар оролцогчдод зөвлөгөө өглөө. Мөн тус газрын Дотоод аудит, мониторингийн газрын дарга Б.Ганхуяг “Шилэн данс болон Нийтийн мэдээллийн ил тод байдлын тухай хуулийн хэрэгжилт, санхүүгийн тайлангийн аудитаар өгөгдсөн акт, албан шаардлага, зөвлөмжийн биелэлт”-ийн талаар мэдээлэл өгсөн бол Санхүү бүртгэл, хөрөнгө оруулалтын газрын дарга Б.Алтанцэцэг “Нийгмийн даатгалын байгууллага болон сангийн үйл ажиллагааны онцлог, дэвшил, сургамж” сэдвээр илтгэл тавьж, оролцогчидтой санал солилцлоо.