Гэмт хэрэг, зөрчлөөс урьдчилан сэргийлэхэд улсын бүртгэлийн байгууллагын анхаарах асуудал хэлэлцүүлэг, сургалтыг зохион байгууллаа

Гэмт хэрэг, зөрчлөөс урьдчилан сэргийлэх, улсын бүртгэлийн байгууллагын үйл ажиллагаанд анхаарах асуудлыг хэлэлцэх зорилгоор холбогдох байгууллагуудын хамтарсан хэлэлцүүлгийг өнөөдөр (2026.10.03) зохион байгууллаа.

Хэлэлцүүлгийг Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлтэй хамтран зохион байгуулж, Нийслэлийн 9 дүүргийн Улсын бүртгэлийн хэлтэс, Хуулийн этгээдийн улсын бүртгэлийн газар, Нийслэлийн үйлчилгээний нэгдсэн төвүүд болон холбогдох байгууллагын нийт 97 албан хаагч оролцов.

Энэ үеэр эдийн засгийн эрх чөлөөний тухай хуулийн зорилт, үзэл баримтлал, НҮБ-ын Аюулгүйн зөвлөлийн хориг арга хэмжээ болон улсын бүртгэлийн байгууллагын анхаарах асуудал, албан тушаалтны ёс зүй, ашиг сонирхлын зөрчлөөс урьдчилан сэргийлэх, мөн мөнгө угаах гэмт хэрэгтэй тэмцэх, урьдчилан сэргийлэх чиглэлээр мэдээлэл, сургалт зохион байгууллаа.

Түүнчлэн мөнгө угаахтай тэмцэх санхүүгийн хориг арга хэмжээ, хуулийн этгээдийн эцсийн өмчлөгчийн бүртгэл, мэдээллийн чанарыг сайжруулах, нээлттэй мэдээллийн стандарт, улсын бүртгэлийн үйл ажиллагааг ашиглан үйлдэгдэж болзошгүй авлига, албан тушаалын болон мөнгө угаах гэмт хэргээс урьдчилан сэргийлэхэд анхаарах асуудлыг хэлэлцэв.

Хэлэлцүүлгийн төгсгөлд оролцогчид дээрх чиглэлээр санал, мэдээллээ солилцож, улсын бүртгэлийн байгууллагын үйл ажиллагаанд хууль тогтоомжийн хэрэгжилтийг хангах, эрсдэлээс урьдчилан сэргийлэхэд анхаарч ажиллах талаар санал нэгдлээ.