“Гадаадын иргэн, харьяатын газрын үйл ажиллагааны гарын авлага боловсруулах, сургагч багш бэлтгэх (T

“Гадаадын иргэн, харьяатын газрын үйл ажиллагааны гарын авлага боловсруулах, сургагч багш бэлтгэх (ToT)” сургалт өнөөдөр эхэллээ

Гадаадын иргэн, харьяатын газрын албан хаагчдын мэргэжлийн мэдлэг, ур чадварыг дээшлүүлэх, байгууллагын удирдлага, менежментийн чадавхыг бэхжүүлэх зорилготой “Гадаадын иргэн, харьяатын газрын үйл ажиллагааны гарын авлага боловсруулах, сургагч багш бэлтгэх (ToT)” хамтарсан сургалт өнөөдөр эхэллээ.

БНСУ-ын Олон Улсын хамтын ажиллагааны байгууллага (КОЙКА)-ын дэмжлэгтэйгээр БНСУ-ын Цагаачлалын бодлогын судалгааны төвтэй хамтран зохион байгуулж буй тус сургалтад төв байгууллага, хилийн боомт болон орон нутаг дахь нэгжийн 40 албан хаагч хамрагдаж байна.

Сургалтын нээлтийн арга хэмжээнд Гадаадын иргэн, харьяатын газрын дарга Б.Энхсүх, БНСУ-ын Цагаачлалын бодлогын судалгааны төвийн дэд дарга И Ху Вон, КОЙКА-ийн Монгол дахь төлөөлөгчийн газрын дэд дарга Со Хён Жэ болон бусад холбогдох газар, хэлтсийн удирдлагууд оролцлоо.

Тус сургалт нь КОЙКА-ийн санхүүжилтээр 2023-2025 онд хэрэгжүүлсэн “Гадаадын иргэн, харьяатын газрын хүртээмжтэй үйлчилгээ, менежментийн чадавхыг бэхжүүлэх төсөл”-ийн үр дүнг бататгаж, хуримтлуулсан мэдлэг, ур чадварыг өдөр тутмын үйл ажиллагаанд нэвтрүүлэх зорилготой төслийн дараах газар дээрх хөтөлбөр юм.

Гадаадын иргэн, харьяатын газрын дарга Б.Энхсүх нээлтийн үеэр хэлсэн үгэндээ КОЙКА болон БНСУ-ын Цагаачлалын бодлогын судалгааны төвийн хамтын ажиллагааны үр дүнг онцоллоо. Төслийн хүрээнд тус газрын 30 гаруй албан хаагч БНСУ-д богино хугацааны сургалтад хамрагдаж, шилжилт хөдөлгөөний удирдлага, мэдээлэл, харилцаа холбооны технологид суурилсан төрийн үйлчилгээний чиглэлээр төсөл боловсруулж, мэдлэг, ур чадвараа дээшлүүлсэн бөгөөд албан хаагчдын боловсруулсан уг төсөл нь КОЙКА-ийн хэрэгжүүлсэн шилдэг 20 төслийн нэгээр шалгарсан нь хамтын ажиллагааны бодит үр дүнг илтгэж байгааг тодотгов.