Audit.mn - Хүний эрхэд суурилсан төсөвлөлтөд Төрийн аудитын байгууллагын оролцоог танилцууллаа

Хүний эрхэд суурилсан төсөвлөлтөд Төрийн аудитын байгууллагын оролцоог танилцууллаа

2026-10-05 — Онцлох мэдээ

Улсын Их Хурлын Хууль зүйн байнгын хороо, Хүний эрхийн дэд хорооноос “Хүний эрхэд суурилсан хандлагаар төсвөө боловсруулцгаая” сэдэвт хэлэлцүүлгийг 2026.10.05-ны өдөр зохион байгууллаа.Хэлэлцүүлэгт Улсын Их Хуралд ажлаа тайлагнадаг төрийн байгууллагууд болон хүний эрхийн чиглэлээр үйл ажиллагаа явуулдаг иргэний нийгмийн байгууллагуудын төлөөлөл оролцож, хүний эрхэд суурилсан төсөвлөлтийн асуудлаар мэдээлэл солилцов. Төрийн аудитын байгууллага боловсрол, эрүүл мэнд, нийгмийн даатгал, амьдрах орчин ба хүртээмж, хүүхэд хамгаалал зэрэг иргэдийн өдөр тутмын амьдралд шууд хамааралтай салбарт гүйцэтгэсэн аудитуудаараа төрийн бодлого, төсөв, санхүүжилт нь иргэдийн эрхийг хангахад бодитой үр нөлөө үзүүлж байгаа эсэхийг үнэлж ажилладаг талаар хэлэлцүүлгийн үеэр танилцууллаа. Тухайлбал, сургууль баригдсан ч хүүхэд бүр чанартай боловсрол эзэмших нөхцөл боломж бүрдсэн эсэх, эрүүл мэндийн салбарын санхүүжилт нэмэгдсэнээр иргэд шаардлагатай тусламж үйлчилгээг цаг тухайд нь авч чадаж байгаа эсэх зэрэг асуудлыг аудитын хүрээнд үнэлдэг. Улмаар илэрсэн асуудал, зөрчил, дутагдлыг арилгах, төрийн үйлчилгээний үр нөлөөг дээшлүүлэхэд чиглэсэн дүгнэлт, зөвлөмжийг холбогдох байгууллагуудад хүргүүлэн ажиллаж байна. Үндэсний аудитын газрын Тамгын дарга, Тэргүүлэх аудитор Б.Бундхорол “Төрийн аудитын төлөвлөлт, гүйцэтгэл нь иргэдэд шууд үйлчилгээ үзүүлэх үйл ажиллагаа биш боловч төсвийн хөрөнгийн үр ашиггүй зарцуулалт, төрийн үйлчилгээний доголдол, хариуцлагын хэрэгжилтийг нотолгоонд суурилан тодорхойлж, шийдвэр гаргагчдад хүргүүлдэг нь хүний эрхийг хангах чиглэлд оруулж буй хувь нэмэр” болохыг онцоллоо. Мөн Төрийн аудитын байгууллага 2027 онд бодлогоор гүйцэтгэх аудитдаа хөгжлийн бэрхшээлтэй иргэний талаар төрөөс баримтлах бодлого, мансууруулах эм, сэтгэцэд нөлөөт бодист тавьж буй хяналт, түүний үр дүн, эрүүл мэндийн даатгалын сангийн санхүүжилт, хөгжлийн бэрхшээлтэй иргэдийн талаарх төрийн бодлого, авлигатай тэмцэх үндэсний хөтөлбөрийн хэрэгжилт зэрэг асуудлыг хамруулж, төрийн бодлого, төсвийн шийдвэрүүд иргэдийн амьдралд хэрхэн нөлөөлж байгааг тодорхойлоход чиглэн ажиллахаар төлөвлөж байгааг танилцуулсан юм. Хэлэлцүүлгийн үеэр УИХ-ын гишүүн Б.Баярбаатар Төрийн аудитын байгууллага нотолгоонд суурилсан, бодит мэдээлэл өгч байгааг онцолсон бол УИХ-ын гишүүн, Хүний эрхийн дэд хорооны дарга Х.Баасанжаргал төрийн аудитын байгууллага өөрийн үйл ажиллагаагаараа хүний эрхийг хэрхэн хангаж, баталгаажуулж, хамгаалж байгааг хангалттай сайн тайлагнасныг сайшаалаа.