2026 оны 11 дүгээр сарын 01-нээс суурь тэтгэвэр олгож эхэлнэ

2026 ОНЫ 11 ДҮГЭЭР САРЫН 01-НЭЭС СУУРЬ ТЭТГЭВЭР ОЛГОЖ ЭХЭЛНЭ

2026 оны 10 дугаар сарын 26-ны өдөр Гэр бүл, хөдөлмөр, нийгмийн хамгааллын сайд Т.Аубакир, ГБХНХЯ-ны Нийгмийн даатгал, хуримтлалын бодлогын газрын дарга В.Рэнцэнханд, Нийгмийн даатгалын ерөнхий газрын дарга Б.Батжаргал болон бусад холбогдох дарга нар Нийгмийн даатгалын багц хуулийн нэмэлт өөрчлөлт, тэтгэврийн шинэчлэлийн бодлого болон 11 дүгээр сарын 01-ний өдрөөс олгох суурь тэтгэврийн талаар мэдээлэл хийлээ.

Улсын Их Хурлын чуулганы 2026 оны 10 дугаар сарын 16-ны өдрийн хуралдаанаар баталсан Төсвийн тодотголоор Нийгмийн даатгалын сангийн 2026 оны төсөвт өөрчлөлт оруулж, 2026 оны 11 дүгээр сарын 01-ний өдрөөс эхлэн тэтгэвэр авагчдад суурь тэтгэвэр олгох нөхцөлийг бүрдүүлсэн.

Энэхүү шинэчлэл нь ахмад настны орлогыг нэмэгдүүлэх, нийгмийн баталгааг хангах зорилготой юм.

Суурь тэтгэврийг тэтгэвэр авагчдаас ямар нэгэн хүсэлт болон нэмэлт баримт бичиг авахгүйгээр тогтоож, олгоно.

Суурь тэтгэврийг хэн, хэрхэн авах вэ?

Нийгмийн даатгалын сан болон цэргийн тэтгэвэр авч буй нийт ахмадуудын 80 хувь буюу 435.0 мянган иргэн суурь тэтгэвэрт хамрагдана. Эмэгтэй 55, эрэгтэй 60 нас хүрсэн тэтгэвэр авагчдад суурь тэтгэврийг олгох юм.

Суурь тэтгэврийн хэмжээг тухайн иргэний шимтгэл төлсөн хугацаа болон тэтгэврийн хэмжээнээс хамааруулан сард 100,000 – 300,000 төгрөг байхаар ялгаатай тооцох ба суурь тэтгэврийн дундаж хэмжээ 224,000 төгрөг байна.

Тооцооллын жишээ:

20 жил шимтгэл төлсөн, сард 769,000 төгрөгийн үндсэн тэтгэвэр авдаг иргэнд сард 201,550 төгрөгийн суурь тэтгэвэр олгогдоно, сарын нийт тэтгэвэр нь 970,550 төгрөг болно.

35 жил шимтгэл төлсөн, сард 769,000 төгрөгийн үндсэн тэтгэвэр авдаг иргэнд сард 276,550 төгрөгийн суурь тэтгэвэр олгогдоно, сарын нийт тэтгэвэр нь 1,045,550 төгрөг болно.

30 жил шимтгэл төлсөн, сард 1,000,000 төгрөгийн үндсэн тэтгэвэр авдаг иргэнд сард 240,000 төгрөгийн суурь тэтгэвэр олгогдоно, сарын нийт тэтгэвэр нь 1,240,000 төгрөг болно.

Жич: Цэргийн, онцлог мэргэжлийн болон олон хүүхэдтэй эх, хөдөлмөрийн хөнгөлөлтэй нөхцөлөөр тэтгэвэр тогтоолгосон иргэд дээрх насны шалгуурт (эмэгтэй 55, эрэгтэй 60) хүрсэн өдрөөсөө эхлэн суурь тэтгэвэр авах эрх үүснэ.

Мөн Нийгмийн даатгалын сангаас олгох тэтгэврийн тухай хуульд тэтгэврийн хэмжээг инфляцын дундаж түвшинтэй уялдуулан жил бүрийн 01 дүгээр сарын 01-ний өдрөөс эхлэн нэмэгдүүлж байхаар заасан. Үүний дагуу 2027 оны 01 дүгээр сарын 01-ний өдрөөс эхлэн Нийгмийн даатгалын сан болон цэргийн тэтгэвэр авагчдын тэтгэврийг 10 хувиар нэмэгдүүлэхээр 2027 оны төсвийн хуулийн төсөлд тусгаад байна.